The Silent Noise

Nang matagpuang ang katawan ng di umano'y nagpakamatay na si Sam Ignacio, mayayanig ang pamilya Carpio. Mahihirapan si Eli, isang batang may kapansanan sa pandinig, na tanggapin ang pagkawala ng gurong malapit sa kaniyang puso. Pipilitin ni Jackie na panatilihing buo ang kanilang pamilya, ngunit sa paglabas ng bagong anggulo sa kaso, mapapalitan ng pangamba ang kanilang pagluluksa.

Sa gitna ng paghahanda para sa burol ni Sam, mapupuno si Jackie ng pagdududa tungkol sa pagkamatay ng kaibigan. Palihim siyang maghahanap ng sagot habang pilit na poprotektahan ni Anton ang pamilya laban sa iskandalo. Iimbestigahan ni Detective Cortez ang mga hindi nagtutugmang detalye ng kaso, ngunit magiging mapanganib ang kaniyang paghahanap ng katotohanan.

Magbibigay-pugay ang Escondido sa alaala ng yumaong si Sam, samantalang makakadiskubre si Detective Cortez ng mga hindi nagtutugmang detalye sa kaso nito. Nang mabaril ang kapatid ni Sam na si Ted, lalo pang titindi ang hinala ni Jackie tungkol sa tunay na dahilan ng pagkamatay ng kaniyang kaibigan. Samantala, makakatanggap si Anton ng hindi inaasahang alok mula kay Mayor Dominguez.

Maghihinala sina Manu at Jackie na may kinalaman si Mayor Dominguez sa pagkamatay ni Sam. Ngunit malalagay sa alanganin ang kanilang alyansa nang biglang mapromote si Manu. Mapupuno si Matteo ng pangamba tungkol sa pagbubuntis ni Jem, ang dahilan upang putulin niya ang kanilang ugnayan. Dahil sa sama ng loob, isisiwalat ni Jem ang isang lihim na yayanig sa mga Carpio.

Aaminin na ni Matteo ang lahat sa kaniyang mga magulang matapos magbato si Jem ng mabibigat na paratang laban sa kanya. Ngayong dawit na sa kaso ni Sam ang binata, gagawin nina Jackie at Anton ang lahat upang protektahan ang kanilang anak. Isang pag-amin naman ang biglang susulpot na magdudulot ng mas maraming katanungan kaysa kaliwanagan.

Kahit pa umamin si Ted na siya ang pumatay sa sariling kapatid, maninindigan si Jackie na hindi pa ito ang buong katotohanan. Labis namang ikasisindak ni Anton nang makatanggap siya ng mga mensahe mula sa numero ni Sam, na nagtatakda ng halaga kapalit sa pagtago ng kanyang mga lihim. Samantala, magkakaroon si Eli ng bagong kaibigan, ngunit hindi lahat sa pamilya ay ikatutuwa ito.